يللا يا بنات ...حضروا لبس العيد و مذاكرتكم..عشان حنروح عند جدو..مذاكرة ايه يا ماما احنا في العيد ..لا ح تعملوا الواجب تاني يوم العيد..عشان تخرجوا اول و تالت يوم ان شاء الله
الله اكبر الله اكبر و لله الحمد..الله اكبر كبيرا..و الحمد لله كثيرا..و سبحانك الله و بحمده بكرة و اصيلا ..لا اله الا الله
امبارح: نينة عملت الكحك و البسكوت و البيتيفور..و مستنياكم يا بنات تروحوا تساعدوها...ايوة انا عايزة اعمل بيتيفور علي شكل قلب..و انا النجمة...و نلزقهم بالمربي.. لا انا عايزاهم بالشيكولاتة
الله اكبر الله اكبر و لله الحمد..الله اكبر كبيرا..و الحمد لله كثيرا..و سبحانك الله و بحمده بكرة و اصيلا..لا اله الا الله
امبارح: انتي لسة نايمة...يللا قومي..مش سامعة التكبيرات...جدو مستني تنزلي معاه تصلي في مصطفي محمود
الله اكبر الله اكبر و لله الحمد..الله اكبر كبيرا..و الحمد لله كثيرا..و سبحانك الله و بحمده بكرة و اصيلا..لا اله الا الله
امبارح:تعالي نقف في البلكونة و شوفي الناس و هي راجعة من الصلاة لابسة الجلاليب البيضا و البالونات..ايه ده..بصي هناك..بابا جه اهو مع ماما..و جايبيين بالونات جديدة معاهم..انا ح اروح افتح لهم الباب
الله اكبر الله اكبر و لله الحمد..الله اكبر كبيرا..و الحمد لله كثيرا..و سبحانك الله و بحمده بكرة و اصيلا..لا اله الا الله
امبارح: هاه ايه رأيكم في لبس العيد؟؟ ..يللا بقي عايزيين نخرج...عايزة اصرف العيدية... طيب مش تحوشيهم احسن..ده اختك الصغيرة بتعمل كدة..لا انا فيه كتب عايزة اجيبها.
الله اكبر الله اكبر و لله الحمد..الله اكبر كبيرا..و الحمد لله كثيرا..و سبحانك الله و بحمده بكرة و اصيلا..لا اله الا الله
امبارح: فيه فيلم اجنبي حلو ح ييجي عرض اول اول يوم العيد..لا..فيلم هنيدي الجديد ح ييجي في نفس الوقت ع الاولي.....و بالليل نتفرج علي مسرحية سك علي بناتك سوا بقي و بكرة ريا و سكينة...ماهو دول عروض كل سنة...طيب عايزين لب و سوداني للسهرة بقي
الله اكبر الله اكبر و لله الحمد..الله اكبر كبيرا..و الحمد لله كثيرا..و سبحانك الله و بحمده بكرة و اصيلا..لا اله الا الله
امبارح: شايلين كتب المدرسة رايح جي يعني..و معملتوش الواجب و لا ذاكرتوا كلمة...و قضيتوا الوقت فرجة ع الافلام....يا ماما ده العيد..و العيد فرحة...يا سلااااااام!!
)
________________
يا تري العيد عامل ازاي النهاردة؟؟؟
كل سنة و انتم طيبين
..........
تحديث: الكل معزوم علي الساقع و السخن و الكحك و البيتيفور و اللمة الحلوة في سلامترو كافيه...و يللا علي حسابي ان شالله عن حد ما حوش..لغاية مارجع من اجازة قصيرة جدا ان شاء الله..عيد سعيد عليكم
موضوع: يا ليله العيد 
الجمعة أكتوبر 03, 2008 11:43 am
